Շենգավիթ վարչական շրջանի ընդհանուր իրավասության դատարանում Ալեքսանդր Ազարյանի նախագահությամբ երեկ շարունակվեց Դավիթ Փահլևանյանի գործի դատաքննությունը:

Ըստ մեղադրանքի՝ 28-ամյա Դավիթ Փահլևանյանը 2012 թվականի հուլիս ամսվա ընթացքում համացանցից իր դյուրակիր համակարգչի մեջ է ներբեռնել ու պահպանել մանկական պոռնոգրաֆիա ներկայացնող 479 ֆիլմ, նկարներ, 9 մուլտֆիլմ: Դրանց դիտման արդյունքում նրա մոտ առաջացել է մանկահասակ՝ 8-12 տարեկան երեխաների հետ սեռական հարաբերություններ ունենալու, իր կրքերին խաթարված ձևով հագուրդ տալու և մանկահասակների ներգրավմամբ մանկական պոռնոգրաֆիայի սյուժեներով նկարահանումներ կատարելու դիտավորություն:

Փահլևանյանը «Նարեկ Համբարձումյան» պայմանական անունով գրանցվել է «Օդնոկլասնիկի» սոցիալական ցանցում և 2012 թվականի օգոստոսի 18-ին նամակ ուղարկել նույն ցանցում գրանցված 8-ամյա աղջնակին: 2004 թվականին ծնված երեխային Փահլևանյանը ներկայացել է որպես մանկական ֆիլմերի նկարահանմամբ զբաղվող անձ, խոստացել է վարձատրության դիմաց նկարահանել նրան հատուկ ֆիլմերում ու սերիալներում, գայթակղել է, որ նկարահանումների համար նրան կվճարի, ու նա կկարողանա իր համար գեղեցիկ շորեր ու համեղ քաղցրավենիք գնել:

Օգոստոսի 18-ից 22-ը Դավիթ Փահլևանյանը «ինտելեկտուալ անառակաբարո գործողություններ» է կատարել ինտերնետային նամակագրության միջոցով՝ երեխային գրելով տղամարդու և մանկահասակ աղջկա միջև սեռական հարաբերությունների ձևերի, տղամարդու և կնոջ սեռական օրգանների նշանակության մասին, համոզել է, որ հանդիպեն, փորձեր կատարեն և սկսեն նկարահանումները:

Հանդիպումը նշանակվել է օգոստոսի 22-ին, ժամը 16-ին, երեխայի շենքի ամենավերին հարկում, որ «փորձերը» ու «նկարահանումը» կատարեն տանիքում:

Փահլևանյանը շտապել է ժամադրավայր, սակայն այնտեղ բռնվել է ոստիկանության աշխատակիցների կողմից ու բերման ենթարկվել ոստիկանության Երևան քաղաքի վարչություն:

Դավիթ Փահլևանյանը մեղադրվում է իր համակարգչում և հեռախոսում մանկական պոռնոգրաֆիա պահպանելու, ակնհայտ 16 տարին չբոլորած անձի հետ անառակաբարո գործողությունների կատարում նախապատրաստելու, երեխային պոռնկության և պոռնկագրական բնույթի նյութեր պատրաստելու հետ կապված գործողություններին ներգրավելու փորձի համար:

Այսօր հարցաքննվեց ամբաստանյալ Դավիթ Փահլևանյանը: Նա հիմնականում իրեն մեղավոր չի ճանաչում, ընդունում է միայն, որ հեռախոսի մեջ անչափահասների մասնակցությամբ նկարահանված երկու պոռնոֆիլմ է եղել:

Ըստ Փահլևանյանի՝ ինքը ամենասկզբից էլ իմացել է, որ շփվում է ոչ թե ութ տարեկան երեխայի, այլ չափահաս կնոջ հետ:

Ընդհանրապես, «Օդնոկլասնիկի» ցանցում «Նարեկ Համբարձումյան» անունով գրանցվելու նպատակը անբարոյական կանանց հետ ծանոթանալն ու սեռական հարաբերություններ ունենալն էր:

«Ես հարյուր տոկոսով գիտեի, որ ութ տարեկանի անունից տարիքով կին է գրում»,- ասաց ամբաստանյալը:

Նա հայտարարեց, թե շփումը շարունակել է այդ չափահաս կնոջը ձեռ առնելու նպատակով: «Ծաղրելո՞ւ իմաստով»,- հարցրեց նախագահողը: «Այո»,- պատասխանեց ամբաստանյալը:

Նա ասաց, թե ութ տարեկանը չէր կարող անգլերեն տառերով այդպես վարժ նամակներ գրել, վարժ բացատրել իր շենքի տեղը, որտեղ նշանակվել էր հանդիպումը: Հանդիպման նպատա՞կը. «Իմ նպատակն էր՝ տեսնեմ, իմանամ, ճանաչեմ, կարող էր էնպիսի մարդ լինել, որ չցանկանայի փողոցում մեզ իրար հետ տեսնեն»:

Քանի որ ինքը համոզված էր, թե անբարոյական կնոջ հետ պիտի հանդիպի, մտածում էր, թե նա կարող է այնպես հագնված լինել, որ ինքը, նրա կողքին գտնվելով, խայտառակվի քաղաքում: Դրա համար էլ հանդիպումը նշանակել էր գրագրությունը վարողի շենքի շքամուտքում: Ավելի ճիշտ՝ շքամուտքի ամենավերին հարկում, որովհետև այնտեղ անցուդարձը շատ քիչ է, տեսնողները հատուկենտ կլինեին:

Հանդիպման գնալուց առաջ իր համակարգչի մեջ «Վ կոնտակտե» ցանցից ներբեռնել էր անչափահասների մասնակցությամբ երկու պոռնոֆիլմ: Քանի որ անծանոթ անբարոյական կինը ներկայացել և գրագրությունը վարում էր որպես ութ տարեկան աղջնակ, ըստ Փահլևանյանի, նրա հետ հանդիպման գնալիս հենց մանկական պոռնոֆիլմեր էր տանում, հնարավոր է, որ հենց դրանք դուր գային այդ կնոջը: Ինքը ցանկացել է, որ տեսնի նրան, շատ է առաջարկել՝ տեսախցիկը միացրու, բայց պատասխանը եղել է, թե սկայպը չի աշխատում:

Հանդիպման վայրում Փահլևանյանը ոչ անբարոյական կնոջ է տեսել, ոչ ութ տարեկան երեխայի: Նրան շրջապատել ու բռնել են ոստիկանները:

Փահլևանյանը զարմացած հարցրել է, թե ինչո՞ւ են իրեն բռնել, ինքը ոչինչ չի արել: Բայց ոստիկանները բերման ենթարկելուց հետո մեկ կամ երկու ժամ ծեծել են նրան, սպառնացել, թե կբռնաբարեն:

Եկել է մի տարիքով ոստիկան, նրան զեկուցել են, թե մանկապիղծի են բռնել: Այդ տարիքովը առանձնազրույց է ունեցել Փահլևանյանի հետ, ասել, թե երեխայի մայրիկը բողոքում է, նա, միևնույնն է, երեխային չի տեսել, ոչինչ չի արել, եթե գրի այն, ինչ իրենք են ուզում, ստորագրությամբ բաց կթողնեն:

Քանի որ Փահլևանյանը օրենքները, իր իրավունքները չգիտեր և իրավապահ մարմինների հետ երբեք չէր շփվել, վախեցել է և ոստիկանների ուզածով է գրել:

Վարչություն են բերել նաև նրա համակարգիչը, ոչինչ չեն հայտնաբերել, ընթերակաների ներկայությամբ համակարգիչն ու հեռախոսը կնիքել ու ստորագրել են:

Հետո տարել են քննիչի մոտ, ասել են, թե իրենց ուզածով գրելու դեպքում կթողնեն, որ տուն գնա: Միաժամանակ պարտադրել են, որ պաշտպանից հրաժարվի:

Նա վախեցել է, որ եթե պաշտպանից չհրաժարվի, իր հետ «կթարսվեն, տուն չեն թողնի»: Բայց ասել են, թե երեք օրով բռնելու են, հետո նոր բաց թողնեն:

Ժամանակավոր պահման մեկուսարանում իր մարմնի վրա կապտուկներ են արձանագրվել: Ինքը վախեցել է ճիշտն ասել, բացատրել է, թե ֆուտբոլ է խաղացել, այդ ժամանակ են առաջացել կապտուկները:

Այնուհետև, ըստ Փահլևանյանի, եկել է «չարաբաստիկ Շամշյանը»: Ամբաստանյալը հայտնեց, թե Շամշյանին թույլ չի տվել, որ նկարի, բայց ոստիկանները ստիպողաբար նկարել են, իրեն ցույց են տվել հեռուստացույցով, սուտ ու վատ բաներ ասել:

Դրանից հետո, երբ դատարան են տարել խափանման միջոցի հարցը քննելու, դարձյալ վախեցել է ճշմարտությունն ասել՝ մտածելով, թե դատավորը ոստիկանների հետ կապված կլինի, իրեն կծեծեն: Ասել է այն, ինչ քննիչի մոտ էր ասել: Հետո էլ խնդրել է իրեն բաց թողնել: «Հիմա հասկանում եմ, որ դա միամտություն էր»,- ասաց ամբաստանյալը:

Մարմնի կապտուկները դարձյալ ֆուտբոլային խաղով է բացատրել, երբ մեկուսարան են տարել: Նորից՝ վախի պատճառով:

Հետո ծնողները փաստաբան են վարձել, ով սկսել է բացատրել, բայց նրա աշխատանքից այնքան էլ գոհ չեն եղել: Միայն ներկա փաստաբանի՝ Գայանե Խաչատրյանի ներգրավումից հետո է ինքը, պաշտպանի շնորհիվ, հասկացել, թե ինչ պիտի ասի և իրեն ինչպես պահի:

Նախաքննության վերջում երկու լրացուցիչ ցուցմունք է տվել, ներկայացրել իրականությունը:

Մարմնի կապտուկներն էլ ՀՔԾ-ից եկել ու ստուգել են, բայց սխալ եզրակացության են հանգել, թե դրանք հենց ֆուտբոլային խաղի ընթացքում կարող էին առաջանալ:

Ըստ Փահլևանյանի՝ իրեն նախաքննության վերջում են ասել, թե համակարգչում այդ քանակությամբ մանկական պոռնոնյութեր են գտել: Դա իրականությանը չի համապատասխանում: Իր համակարգչում ոչինչ չի եղել, այն երկու տեսաֆիլմն էլ, որ քաշել էր, հետո փոխանցել իր հեռախոսին, համակարգչի միջից ջնջել էր, որ ծնողները կամ ընկերները չտեսնեն:

Ըստ Փահլևանյանի՝ այդ պոռնոնյութերը նրա համակարգչի մեջ ոստիկանության կիբերհանցագործությունների դեմ պայքարի բաժնի աշխատողները գցած կլինեն:

Մեղադրողի հարցին Փահլևանյանը պատասխանեց, որ երեխայի կայքում տեղադրված մանկական լուսանկարները, նշված տարիքը կասկած չեն առաջացրել. ինքը համոզված է եղել, որ չափահաս կին է հանդես գալիս երեխայի անունից: «Օդնոկլասնիկում» մի տասը հազարից ավել նման էջեր կան. անբարոյական կանայք երեխայի կամ ավելի գեղեցիկ կնոջ նկարով են քողարկվում:

Փահլևանյանը, ով սցենարների հանդեպ, երևի, հատուկ մոտեցում ունի, նշեց, որ տուժողի մոր վարքագծում էլ երկու սցենար է տեսնում, որոնցից երկրորդը այն է, ինչ իրականում եղել է՝ իրականությունն է:

Մեղադրողը հարցրեց. «Ոմն Փահլևանյանի դատապարտելու նկատառումներով մայրն իր երեխային կարո՞ղ էր այսպիսի պատմության մեջ ներքաշել, այսպիսի բաներ սովորեցնել»: Փահլևանյանը պատասխանեց, թե իր կարծիքով ևս դա աննորմալ բան էր:

«Ինձ համար տուժողը երեխան չէ»,- ասաց ամբաստանյալը:

Թե ինչու էր չափահաս «անբարոյական» կնոջ հետ հանդիպման գնացել մանկական պոռնոֆիլմերով, Փահլևանյանն ասաց, որ նախկինում էլ անբարո կանանց է տեսել, ովքեր ցանկացել են պոռնոֆիլմեր նայել: Եթե այս կինը ներկայացել էր որպես երեխա, ուրեմն այդ ֆիլմերը նրան դուր կգային:

Որ չափահաս կնոջ հետ է շփվում՝ ամբաստանյալը հասկացել էր նաև նրա արտահայտած «խելամիտ մտքերից»: «Խելամիտ մտքեր» ասելով՝ նկատի ուներ, որ կինը նախադասությունները նորմալ դասավորված էր գրում, երեխաները դա անել չեն կարողանում:

Թե ինչու է չափահաս կնոջը բացատրել տղամարդու և երեխայի հնարավոր սեռական հարաբերությունների մասին, Փահլևանյանը պատասխանեց, որ մտածել է՝ դա կնոջը դուր է գալիս: «Չեմ կարող բացատրել «Օդնոկլասնիկի» աուրան»,- ասաց ամբաստանյալը՝ անբարոյական կնոջ փնտրտուքով ութամյա աղջկա հետ նամակագրության մեջ մտնելը չկարողանալով բացատրել իրենից տարիքով մեծ մեղադրողին, դատավորին: «Իմ տարիքի երիտասարդները ինձ լավ կհասկանան»,- ասաց նա:

«Եթե իմանայի, որ իսկապես անչափահասի հետ եմ շփվում, չէի հանդիպի: Միայն հոգեկան հիվանդություն կամ շեղում ունեցողը կարող էր երեխայի հետ այդ մտքով հանդիպել: Իսկ ես առողջ եմ»:

Տուժողի ներկայացուցիչը հիշեցրեց, որ չափահաս կարծած կնոջ հետ խոսելիս ամբաստանյալը, բացատրելով տղամարդու և կնոջ սեռական օրգանների նշանակությունը, օգտագործել էր երեխաների կողմից օգտագործվող բառեր: Հանդիպումը նշանակել էր Փահլևանյանը, ամբաստանյալն էլ չժխտեց դա, ասաց, որ շփման ընթացքում այդպես է ստացվել: Հանդիպումը նշանակել է ոչ թե պարզապես անբարոյական կնոջ շենքի շքամուտքում, այլ՝ տանիքում: «Այդ ո՞ր անբարոյական կինը կբարձրանար իր շենքի տանիք՝ ձեզ հետ հանդիպելու: Դուք գրում էիք, որ այդ «կինը» պապային ու մամային ոչինչ չպատմի, տնից դուրս գա՝ իբր շնիկին տանում է զբոսանքի, ու բարձրանա ամենավերին հարկը: Երբ «կինը» ասում էր՝ տասնհինգ տարեկան քույրիկիս հետ գամ, նա էլ նկարահանվի, դուք չէիք համաձայնում՝ ասելով, թե ձեզ ութից տասներկու տարեկան աղջիկներ են պետք»:

Հանդիպման օրը, ըստ տուժողի ներկայացուցչի, Փահլևանյանը անընդհատ գրել է, տեղեկացրել իր բոլոր քայլերին՝ որ երթուղային է նստել, արդեն մոտենում է, նորից գրել է «սցենարով» նախատեսված գործողությունները, «էքստազի մեջ ընկած»՝ պահանջել է, որ երեխան կրկնի բոլոր բառերը, որպեսզի ինքը համոզված լինի, որ նա «դերը» սովորել է: Այդ շփումը վարել են արդեն ոստիկանության աշխատակիցները, տուժողի ներկայացուցիչը դա հետո է կարդացել:

Կինը հարցրեց. «Ինչո՞վ էիք համոզված, որ խոսում եք անբարոյական չափահաս կնոջ հետ: Կարող էր տղամարդ լինել, ձեզ կանչել հանդիպման ու հաշվեհարդար տեսնել: Անբարոյական կնոջ հետ նրա շենքի տանիքում հանդիպում նշանակելու փոխարեն հազարումի մոթել կա, այնտեղ նշանակեիք, եթե, իհարկե, համոզված չէիք, որ երեխա է գալու հանդիպմանը»:

«Վերջին հարկում քիչ մարդ է լինում: Այդ կնոջ ապահովության համար եմ առաջարկել»,- ասաց Փահլևանյանը:

«Եթե ձեզ նորմալ տղամարդ եք համարում, աննորմալ եք անվանում երեխայի հետ այդպիսի հանդիպման գնալը, ապա նորմա՞լ է անբարոյական կնոջ հետ առաջին հանդիպմանը մանական պոռնոֆիլմեր տանելը»:

Փահլևանյանի շահերի պաշտպանը մի քանի լրացուցիչ հարցեր տվեց տուժողի ներկայացուցչին: Հիմնական հարցն այն էր, թե ինչու է կինը շարունակել շփումը, եթե Փահլևանյանի գրածը նրան զայրացրել էր:

«Իմ երեխայի անվտանգությունը ապահովելու համար: Ես չգիտեի, թե ով է իմ երեխային այդպիսի բաներ գրում: Կարող էր իմ հարևանը լինել, իմ բարեկամը, որևէ մտերիմ մարդ: Անհրաժեշտ էր պարզել, թե ով է»,- պատասխանեց տուժող երեխայի մայրը:

Փահլևանյանի շահերի պաշտպանը հայտարարեց, թե հաջորդ դատական նիստին միջնորդություններ պիտի անի: